May ID Ka Ba?

Nitong mga nakalipas na araw, muntik-muntikan kong malimutan ang ID ko sa bahay.

Abala kasi sa opisina dahil ibinabalita namin ang pagluluksa ang mga Pinoy sa pagpanaw ni Papa Juan Pablo II. Tumutok din tayo sa Vatican at nag-antabay sa mga pangyayari doon, hanggang sa maibalita ang pagkakapili kay Cardinal Ratzinger na ngayo’y Pope Benedict XVI na.

Natulig din tayo sa patuloy na pagtaaas ng langis at nag-abang din sa kahihinatnan ng VAT bill sa Senado. Habang nagaganap ang lahat ng ito, may niluluto na pala ang Palasyo.

Kanina, naibalita ang paglagda ni Pangulong Arroyo sa Executive Order 420 na siyang gagabay sa pagpapatupad ng national ID system.

“All government agencies including government-owned or -controlled corporations [GOCCs] are hereby directed to adopt a multi-purpose ID system,” sabi raw ng executive order, ayon sa ulat ng INQ7.

Agad namang binatikos ng mga kontra rito ang naturang kautusan. Magastos daw to, sabi ng IBON. Sabi naman ng mga nasa Senado, kailangang idaan ito sa kanila. Siyempre, para na nating naririnig si Sec. Bunye na nagsasalita at sinasalubong ang lahat ng mga batikos.

Pero ang tanong, makapasa kaya ito sa Korte Suprema? Nung panahon ni Pangulong Ramos, di kasi lumusot ang kanyang Administrative Order 308.

Siguro naman, di na madadagdagan ang pagkarami-raming cards sa wallet ko. Ikaw, may ID ka na ba?