Ang katarantaduhang pumatay kay Tado

Kabilang ang komedyante at aktibistang si Arvin Jimenez — mas kilala bilang Tado — sa 14 kataong namatay sa Bontoc, Mt. Province noong Biyernes matapos mahulog sa bangin ang sinasakyan nilang bus.

Ang biyahe ni Tado ay kaugnay ng isa niyang proyektong nagsusulong  ng pagkalinga sa kalikasan, ayon sa DAKILA Philippine Collective for Modern Heroism, isang organisasyong kinabibilangan niya.

Sa kanyang sariling paraan, nagsulong si Tado ng pagbabago sa ating lipunan. Pero minalas si Tado. Nabiktima siya ng katarantaduhang bumabalot sa sistema ng pampublikong transportasyon sa ating bansa. Napakarami nang buhay na kinitil ng katarantaduhang ito.

Noong 1995, kasama ang aking ina sa mga mga nasawi matapos masunog at lumubog ang Viva Antipolo VII sa pagitan ng Lucena at Marinduque. Ayon sa mga ulat, overloaded ang bapor nang ito’y masunog at lumubog. Kwestyonable rin daw ang kakayahan nitong magpatuloy na bumiyahe.

2011 nang mamatay si Chit Estella, propesor sa UP at dati naming managing editor sa Manila Times at editor in chief sa Pinoy Times. Binangga ng isang bus ang taxi na sinasakyan niya.

Nitong Disyembre 16  lang, isang bus ang nahulog mula naman sa Skyway sa Taguig. Hindi bababa sa 21 ang namatay. Luma na raw ang gulong ng nasabing bus.

Patong-patong ang mga reklamo tungkol sa pampublikong sasakyan sa ating bansa, lalo na sa mga bus. Sa papel lamang nakalahad ang mga patakarang pangkaligtasan. Walang seat belt ang ilang taxi. Luma na at di na dapat ibiyahe ang ilang bapor. Kulang ang safety jackets ang ilang bapor.  Sira ang gulong o walang preno ang ilang bus. Kulang sa kakayahan ang mga nagpapaandar ng mga sasakyan. Karamihan sa mga ganitong problema, nagpapatuloy at nabibisto lamang sa tuwing may aksidente at maraming mga taong namamatay.

May mga problema namang halata na, ngunit hindi pa rin mahanapan ng solusyon.

Sobrang dami ng mga bus.

It seems like there are more buses than people in Metro Manila.

— Ederic Eder (@ederic) July 5, 2013

May bus drivers na barumbado sa kalsada.

@MMDA: Will u pls flag this Worthy Transport Bus UYA994? It was weaving in n out of EDSA like a motorcycle. Alabang – Navotas via EDSA!

— Edwin Lacierda (@dawende) January 19, 2014

May bus at taxi drivers na 24 oras nagtatrabaho. Walang regular na sahod ang mga tsuper.

Regularization of bus drivers & conductors – another bill we would like Congress to pass. http://t.co/3MP3DL9i

— Teddy Casiño (@teddycasino) November 2, 2012

Parang sardinas ang dami ng mga tao sa MRT at LRT.

Sardinas sa MRT kahapon, sardinas sa rush hour sa lrt papunta sa UST, pati ba naman pauwi na-sardinas parin ako? HAHAHAHA fak

— Bea Altre (@beaaltre) November 22, 2013

May mga tsuper na hindi sumusunod sa traffic lights.

Beating the red light naman ang isang airport taxi na tinutukoy na may sala sa pagbangga ng isang motor sa likuran nito. #Alisto

— Alisto GMA (@AlistoGMA) January 9, 2014

Kailangan talagang subukan ng ilang matataas na opisyal ng pamahalaan ang pagsakay sa public transportation paminsan-minsan para maranasan nila ang katarantaduhang araw-araw na pasan-pasan ng mga karaniwang mamamayan.

Kung hindi maititigil ang katarantaduhang ito, baka marami pa ang matulad sa aking ina, kay Ma’am Chit, at kay Tado.

Fast losing hope on the state of public transportation and the bus industry in this country. Not enough people dead yet? #Tado

— carlosceldran (@carlosceldran) February 7, 2014