Oras

Lagi nating sinasabing napakabilis ng paglipas ng panahon.

Ang mga pamangkin mong batang tila kapapanganak pa lamang, sa isang buwan ay mag-iisang taon na. Ang asteeg na binibining noo’y gusto mong pormahan pero alinlangan ka dahil baka hindi ka man lang tapunan ng sulyap, ngayo’y tatlong taon mo nang kasintahan. Ang paborito mong proyekto, limang taon nang online. Ang dakilang martsa ng pagtatapos mo sa kolehiyo na tila kahapon lamang sa iyong alaala, naganap pitong taon na ang lumipas. At ang mga unang hakbang na puno ng pagkamangha, kasabikan, at kabang dala ng pagsisimula sa pamantansang hirang–na hanggang ngayo’y sariwa pa sa iyong gunita–isang dekada’t isang taon na palang pinilas sa kalendaryo.

Sadyang kaybilis nga ng panahon. Ngunit napapansin kaya nating ang taong lumilipas ay binubuo ng mga buwan, linggo, at araw–at ang bawat araw ay gawa ng mga oras, minuto, at segundo?

Sa bawat araw ng buhay natin, ilang oras, sandali, at saglit ang nasasayang? Gaanong panahon ang lumilipas nang di natin namamalayan?