Bagong bampira sa K-drama

Mahilig ako sa mga kuwentong bampira. Paborito ko nga ang “The Vampire Chronicles” series ni Anne Rice. Pinanood ko ang “The Vampire Diaries.” Pati ‘yong “Twilight” series, nabasa at napanood ko rin. Kaya naman aabangan ko ‘tong bagong bampira sa K-drama. Si Ok Taec-yeon ang latest vampire sa “HeartBeat,” na ipapalabas sa Prime Video simula sa June 26.

Isang dantaon nang nahihimbing si Seon U-hyeol (Ok Taec-yeon), isang bampirang naghahangad maranasan ang magmahal. Kaso lang, ginambala ni Joo In-hae (Won Ji-an), isang babaeng walang panahon sa pag-ibig, ang kanyang pagtulog. Tapos, magkaka-developan sila!

Sa Prime Video rin namin pinapanood ngayon ang “Tale of the Nine-Tailed 1938,” na tungkol naman sa magkapatid na gumiho, mga nilalang sa mga alamat ng Korea. Sobrang entertaining ‘to, at sana’y ganoon din ang “HeartBeat.”

Bukod sa bampira, nahilig din akong manood at magbasa ng tungkol sa mga zombie. Sinubaybayan ko ang “Warm Bodies” book series ni Isaac Marion at movie version ng unang libro. “Block Z” nina Joshua Garcia at Julia Baretto ang huling pinanood ko sa sinehan bago ang COVID-19 pandemic. Pinanood ko rin ang mga K-drama na “All of Us Are Dead,” “Kingdom,” at “Zombie Detective.” Pagkatapos ng mga zombie sa K-drama, bampira sa K-drama naman!