Darna

Simula ngayong gabi, muli na namang lilipad si Darna — ang Filipina superhero na tagapagtaguyod ng kapayapaan at katarungan at kalaban ng kasamaan.

Pareho kong paborito ang dalawang lead star sa bagong Darna ng GMA-7: si Marian Rivera bilang Narda/Darna, at si Mark Anthony Fernandez bilang Eduardo, ang katipan ni Narda. Unang pagtatambal nila ito.

Si Marian, na unang nakilala at minahal ng mga manonood bilang Mari Mar, ang siya ring gumanap bilang Dyesebel, isa pang obra ng dakilang nobelista sa komiks na si Mars Ravelo (na mas karapatdapat maunang maging national artist). Sidekick ni Marian sa Dyesebel ang batang si Robert “Buboy” Villar, na siya namang gaganap ngayon bilang Ding.

Si Mark naman, na dating miyembro ng Gwapings noong panahon ng aming maagang kabataan, ay naging leading man sa mga telenovela at telefantasya ng Kapuso Network. Napanood na natin ang mahusay niyang pagganap sa Impostora, Ako si Kim Sam Soon, All About Eve, at Luna Mystika.

Sa bagong Darna, matutunghayan ang kuwento ni Narda, isang maganda ngunit pilay na dalagang lumaki sa bahay-ampunan. Doon ay magkakaibigan sila ng kababatang si Eduardo, na magugustuhan din ni Valentina, ang kaibigan ni Narda.

Magbabago ang simpleng buhay ni Narda kapag nalaman niyang tagapagmana siya ng isang mahiwagang batong magbibigay sa kanya ng kakaibang kapangyarihan.

Ngunit tinanggihan ng dalagang nasawi sa pag-ibig kay Eduardo ang nakaatang na tungkuling maging bagong Darna. Sa paniniwala kasi niya, hindi ito makakayanan ng isang simple at may kapansanang babaeng tulad niya. Kasabay ng kanyang pagtanggi ang pagdating ng mga kampon na kasamaan sa kanyang bayan. Dahil dito, magpapaubaya si Narda at yayakapin na ang kanyang kapalaran bilang bagong Darna.

Para sa iba pang official photos mula sa GMA-7 (Salamat, Jhops!), bisitahin ang Hallyudorama.