Sa Alaala ni Shaider

Kilala n’yo ba si Shaider, ang pulis pangkalawakan?

Noong maliit pa ako, dahil wala kaming sariling TV ay nakikipangapit-bahay ako para lamang mapanood ang pakikipaglaban ni Shaider sa mga tauhan ni Phuma Lear, at para na rin masilip ang panty ni Annie. Para sa akin, ang galing-galing ni Shaider (o Alexis kapag hindi pa nagta-transform) at ang ganda-ganda ni Annie.

Tinuruan din ako ng ilang mahahalagang bagay nina Shaider at Annie, gaya ng mahigpit na pagkapit sa katuwiran at ang pagtataguyod ng kalayaan. Buong giting nilang ipinagtanggol ang daigdig mula sa mga dayuhang (as in aliens from outer space) mananakop. (Siguro partly responsible sina Shaider at Annie kung bakit naging anti-imperialist ako at tuwang-tuwa sa nakikita ko ngayong pagtayo ng milyon-milyong tagadaigdig laban sa di-makatarungang plano ni Lear, este, ni G.W. Bush pala!)

Kamakaila’y nalungkot ako sa natanggap kong e-mail na nagbabalitang patay na raw si Shaider. Nang binasa ko ang Google-translated site na binabanggit sa email, nalaman kong noong Hulyo 24, 2001 pa pala pumanaw sa edad na 37 dahil sa kanser sa atay si Hiroshi Tsuburaya, ang artistang Hapon na gumanap na Shaider.

Sabagay, hindi mismong si Shaider o Alexis ang namatay — pagka’t ang karakter ay maaaring gampanan ng iba — pero nakalulungkot pa ring isipin na yung “idol” mo dati ay tepok na pala.

Gayunpaman, ang magiting na si Alexis/Shaider ay mananatiling buhay sa alaala ng mga tagahangang kagaya ko.

(Ang mga larawan ay mula sa http://membres.lycos.fr/gyaban/hommage.htm at sa http://gyaban.tokusatsu.org)