Si Ka Satur

Naalala ko noong mawalan ako ng pinakauna kong trabaho. May tatlong buwan pa lamang akong correspondent sa Manila Times–na pinamamatnugutan noon ni Ma’am Malou Mangahas–nang ito ay magsara matapos mapilitan ang mga may-ari na ibenta ang dyaryo sa isang crony ni Pangulong Estrada.

Sa isang pagtitipon ng mga taga-media noong kasagsagan ng isyu ng panggigipit sa Times, dumalo ang guro namin sa UP na si Prof. Carolina Malay at ang kanyang kabiyak na si Satur Ocampo. Ipinakilala ako ni Ma’am Malay sa kanyang asawa at sinabihan ako ni Ka Satur–na matagal ding naging reporter ng lumang Manila Times bago maging aktibista at rebolusyunaryo–na huwag daw akong mawawalan ng pag-asa.

Nakakapanlumo ang naranasan ni Rep. Satur Ocampo ng Bayan Muna kahapon. Kinaladkad, binuhat at itinulak siya ng mga pulis. Isinakay sa eroplano kasama si Ma’am Malay at ang kasamahang kongresista, si Teddy Casiño, para dalhin sa Leyte at iharap daw sa korte, pero ibinalik din sa Maynila sa gitna ng biyahe. Joyride ‘ika nga. Pero hindi joyful.

Pero hindi naman nag-iisa si Ka Satur, kahit ang kanyang mga tagapanalig ay tila insektong nililipol sa kasalukuyan. Kahapon, nagdaos ng isang pagtitipong tinawag na “Free Satur, Stand for Justice” ang kanyang mga kaibigan sa pangunguna nina Vice President Teofisto Guingona at Senador Bobby Tañada.

“I understand he’s the longest detainee in many camps. Kaya yung nangyayari sa kanya ngayon , refresher course lamang. Meron na siyang PhD kaya kahit saan siya makulong — ok kay Ka Satur. Sanay si Satur kaya we have to give him justice now because he deserves it,” wika ni VP Guingona.

Naroon din sa pagtitipon si Anto, anak nina Ka Satur, at tumulong mag-alaga sa aming mga Jardine Davies scholars noong mga panahong nagsusumikap kaming maka-survive sa UP. Napaiyak si Anto habang sinasabing “Ang gusto lang naman namin ay maglingkod sa bayan.” Sa mga bintang sa kanyang ama, ito ang sinabi ni Anto: “I find it preposterous. He’s not capable of doing that.”

Tulad ng nasa text message na di ko alam kung naipadala ko sa kanya noong isang taon, gusto kong ibalik sa kay Anto at sa kanyang pamilya ang sinabi ng tatay niya sa akin noong labis kong dinaramdam ang pagkawala ng Manila Times. Huwag tayong mawawalan ng pag-asa.

0 thoughts on “Si Ka Satur”

  1. alam mo bang disappointed na disappointed kaming mag-asawa sa pagkakadakip kay mang satur nung nanonood kami ng TFC nung isang araw?

    ganyan na ba talaga sa gobyerno natin, ederic? nakakayamot na talaga.

    btw, napanood kita sa I-Witness na kasama si howie severino. kamusta na nga pala yung isyu na yun sa coconut levy sa marinduque? (Kabado ako dyan, ah… eleksyon pa naman. baka matulad nga yun sa fertilizer scam nung nakaraang eleksyon.) ginising ko pa nga ang mister ko kasi madaling-araw na nun at nagising lang ako kasi bukas pa ang tv. sinabi ko sa asawa ko na kaibigan kita 🙂 natuwa akong makita ka sa TV 🙂

  2. Ate Sienna, nakakalungkot na ngang talaga ang mga nangyayari sa atin. Kakaiba.

    Salamat pala sa panonood ng Coco-Loka. TFC ba o GMA Pinoy TV? Hehe. Sana nga, hindi
    ma-magic yung pondo.

Leave a Reply