Seryoso

(Unang nalathala sa Pinoy Gazette)

May kumalat na joke sa text tungkol sa mga kandidato sa pagka-presidente. Sino raw ang dapat iboto?

“Si Gloria ba na walang isang salita? Si FPJ na ayaw magsalita? Si Roco na salita nang salita? Si Lacson na patay ka pag nagsalita ka? Si Brother Eddie na kapag nagsalita, may himala?”

May mga nagdagdag ng: “O si Eddie Gil na nakakatawa kapag nagsalita?”

Itinuturing ng marami na isang katatawanan ang pagkakasali ni Eddie Gil sa labanan sa pagkapangulo ng Pilipinas. At ngayong na-disqualify na siya ng Comelec, masasabing seryoso na raw ang laban.

Pero ang totoo niyan, matagal nang hindi biro ang labanan.

Sa kabila ng pagtawa ng marami sa mga sagot ni Eddie Gil sa panayam sa kanya ni Vicky Morales sa programang Bio-Data ng GMA-7, siguradong nababagabag din sila’t nanlulumo sa takbo ng pulitika at pamamahala sa bansa.

Sino ba naman ang hindi mawawalan ng pag-asa kung ang kanilang pinuno’y tumalikod sa kanyang pangako–lalo na kung sa kanyang pangangako ay ginamit pa ang pangalan ng pambansang bayani–at pagkatapos ay kinuha bilang katambal sa eleksyon ang isang bagong pulitikong popular ngunit ayon sa marami ay hindi pa handa upang umakyat ng posisyon?

O kung ang nagbabadyang maging susunod na pangulo ay isang artistang walang karanasan sa pamamahala ng bansa at atubiling humarap sa publiko upang ipaliwanag ang kanyang plataporma?

O kung ang nakilala bilang masipag at makabayang senadora, ang Crying Lady ng impeachment trial, na naluha habang sumasayaw ang isang kontrabida ng People Power 2 ay nakikisayaw na rin at inaawitan pa ang mismong anak ng pangunahing dahilan ng pagputok ng People Power 2? Hindi ka ba naman maiiyak?

Nariyan na ang mga kalagayang iyan bago pa man tayo patawanin ni Eddie Gil.

E paano kung ang isang kinikilalang haligi ng makabayang kaisipan, ang inakala nating halos iisa at pinakahuling pag-asa ng makatuwiran at makataong pamamahala at paglilingkod sa bayan ay biglang sumunod sa Crying Lady at makipag-koalisyon na rin sa kampo ng kung tawagin ilang mga Pilipino sa Internet ay “bangungot ng bayan”?

Aba! Para na ring sumanib si Gandalf ng Lord of the Rings sa panig ng kalabang si Saruman. O kaya’y ang nangangalaga kay Harry Potter na si Professor Dumbledore ay na-recruit na ng alagad ng kadiliman na si Voldemort!

Ang ganitong mga sitwasyon, walang duda ay talagang seryoso’t hindi na nakakatawa.

May pag-asa pa ba tayong makabangon?

6 Replies to “Seryoso”

  1. Meron pa tayong choice! Ang maghanap ng murang lumalakad ng visa sa US, ang bumili ng visa galeng sa UK o kaya naman eh pumunta na lang sa Manila Post office para bumili ng selyo at ikapit sa noo at kahit saan na lang makarating via airmail (pede ba yun?). At sa halip na nakalagay eh “Please do not fold, Pictures Inside” eh palitan ng ” Please Do not Fold Human Inside” pero lintek kamahal na rin ng selyo. Pede rin siguro na nakalagay eh ” Tru the Kindness of Philippine System of Goverment” ngeks. Patawa lang po!!! Tawad po!!!

  2. “For every dark cloud, lies a silver lining”. Hindi ako mawalang galang na kay Dzune, pero hindi ko gusto na mag-alisan ang mga Pilipino sa Pilipinas. Kailan pa natin haharapin ang mga problemang bumabalot sa ating masalimuot na kasaysayan? Kailan pa natin aantaying magbago ang ihip ng mga hangin? Kailan pa tayo maninindigan para sa magandang kinabukasan?

    Para sa akin hindi biro ang darating na eleksyon sa Mayo, sapagkat, nakasalalay dito ang kinabukasan ng 82 milyong mga Pilipino, sa susunod na 6 na taon.

    Wala na tayong ginawa kundi ang laitin ang sarili nating lahi at gawin itong katawa-tawa. Lagi kong ikinalulungkot ang mga masasamang nangyayari sa ating bayan. Naway magkaroon na ito ng hangganan.

    Lovingly yours,
    Helen

    (hehehe! para naman hindi ako talaga magmukhang seryoso)

  3. ano ba yan bitin na naman comment ko…kulti ng enter key.

    kay lacson ako….cguro kailangan ng mga Pilipino na matakot para sumunod. d man tumino lahat at least may mga titino. makalusot man amuyong ni lacson at least alam nating partido nya…mas mainam kesa sa lahat eh nakakalusot.

Leave a Reply