Nitong Kapaskuhan, niregaluhan ako ng Rubik’s Cube ng isang Kapuso. Medyo nauuso kasi ito ngayon sa isang departamento sa opisina. Naaliw ako sa bagong Rubik’s Cube ko dahil isang hamon ang pagbubuo nito. Pero hanggang ngayon, iisang gilid pa lamang ang nabubuo ko — kadalasan ay iyong puti.

Minsan, ipinahiram ko ang Rubik’s Cube kay Mhay at aliw na aliw rin siya sa pagbubuo nito. Halata ba sa larawan? Mas mabilis siyang makabuo kaysa sa akin.

Kahapon, pagkatapos ng munting kitaan ng Tinig.com sa Trinoma ay naghanap kami ng Rubik’s Cube. Ang una naming napuntahan ay ang Toys R Us. Pagdating namin doon, may isang 3×3 Rubik’s Cube na hawak-hawak ng isang lalaki. Hinintay naming bitawan niya iyon at agad kong dadamputin tuloy ididiretso sa counter. Kaso lang, sa halip na bitawan ay binitbit niya iyon papunta sa customer service. Nang tanungin namin ang mga nagtitinda — na hindi masyadong namamansin — sinabi nilang out of stock daw. Aba, mabenta! Kakakita rin lang namin ng naglalaro nito sa labas ng tindahang iyon.

Na-disappoint kami pero tumuloy kami sa mas malaking tindahan ng mga laruan sa Landmark. Out of stock din daw. Hmm, uso nga siya kung ganoon. Wala rin sa isa pang maliit na tindahang pinuntahan namin.

Pag-uwi namin, naisipan kong tingnan sa tianggeng malapit sa amin. Ubos na raw yung mga may regular colors, at ang natira na lang ay yung may design na Picachu. Binili ko na rin. P20 lang naman. Kaso, hindi ko nilalaro kasi nakakalito.

Sa eBay Philippines, may iisang Rubik’s Cube item na ibinebenta. Isang araw pa bago magtapos ang auction, at may 26 bidders na. P505 na ito ngayon, at mukhang tataas pa. Hindi na ako makiki-bid.

Uso man ito o hindi ngayon, gusto ko pa ring magkaroon kami ni Mhay ng isa pang Rubik’s cube para sabay na kaming magso-solve nito.


Ederic Eder

Ederic is a Filipino communications worker in the telecom, media, and technology industry. He writes about K-dramas and Korean celebrities for Hallyudorama.

He used to be a social media manager for news at GMA Network, where he also headed YouScoop, GMA News and Public Affairs’ citizen journalism arm.

He was with Yahoo! Philippines for more than three years before returning to GMA Network, where he was also previously part of the News Research section.

Author posts
Related Posts