Rene at Dulce Saguisag

Kahapon, nabalitaan ko sa Balitanghali na alam na si dating Senador Rene Saguisag na pumanaw ang kanyang asawang si Dulce nang maaksidente sila noong umaga ng Nobyembre 8. Ayon sa kanyang anak, hindi raw umiyak ang abogado ni Erap, pero tumaas ang presyon ng kanyang dugo.

Nang umagang iyon, nagulat ako sa twit ni Sir Danny Arao: “On my way to Tagaytay. Listening to the news about Rene Saguisag’s vehicular accident. His wife is unfortunately dead.” Kaagad akong nagbukas ng computer at TV, at nalaman ko ang iba pang mga detalye.

Sobrang nalungkot ako. Hindi dahil sa kaibigan o fan ako ng mga Saguisag, kundi ilang araw lang ang nakakalipas napanood ko pa ang dating senador at abogado ni Erap sa telebisyon, at inulan niya ng papuri ang kanyang asawa habang nasa isang talk show siya.

Inisa-isa niya ang qualifications ni Mrs. Saguisag para ipaliwanag kung bakit naging DSWD secretary ang kanyang asawa pagkatapos magbitiw ni Gloria sa cabinet ni Erap. Hindi ako sigurado sa eksaktong mga kataga, pero parang “the most intelligent and most beautiful woman I’ve ever met” ang description niya kay Mrs. Saguisag. Ang sweet naman kako ng mga ito. Tapos biglang ganoon na lang.
Ayon kay Atty. Rebo, anak ni Saguisag, lagi raw sinasalo ni Dulce ang kanyang asawa. Si Dulce raw ang sandigan ni Saguisag, ayon kay Senador Joker Arroyo, “Rene will be lost without Dulce. That’s their relationship.”

Ngunit sinabi ni Rebo na kilala nilang matatag ang kalooban ng kanilang ama at kaya niyang lampasan ang nangyari sa kanilang pamilya.

Halos naiyak din ako nang ipakita sa TV ang video ng batang abogado at ang kanyang kapatid sa ospital. Sino ang hindi mababaliw sa balitang pumanaw na ang inyong ina at krikal ang kalagayan ng inyong ama?

Nang malaman ko ang pagkamatay ni Mama, sa parang binawian ako ng katinuan at tinakasan ng lakas. Parang hindi totoo. Ganoon din siguro ang naramdaman nila.

Pero sa kabila ng mga trahedyang ganito, sa paglipas ng panahon ay mapapawi ang pagdadalamhati at ang magagandang alaala’y mananatiling inspirasyon upang magpatuloy sa buhay.

5 thoughts on “Rene at Dulce Saguisag”

  1. ngayon ko lang nalaman ang balitang ito. nakakalungkot pero mabuti rin na nagkaron ng pagkakataon si dating sen saguisag na puriin in public ang kanyang asawa, alam nating may pagmamahalan at respeto sila sa isat isa. i pray for their family…

  2. parehas tayo ng naramdaman ng malaman ang nagyari sa pamilyang Saguisag. Nanghihinayang din ako at hindi nakadalo si Atty. Rene sa libing ng asawa. Hindi na nya nakita kahit sa huling sandali ang asawa nya.

    napaka-ironic kasi ilang linggo bago ang pagpanaw ni Gng. Dulce, ay talagang laman sya ng interview kay Atty. hindi lamang sa telebisyon kundi ati sa mga dyaryo. Kahit ako narinig ko mismo mga sinabi nya.

    At least kahit paano, naipadama ni Atty sa harap ng madaming tao gano nya kamahal asawa nya. at marahil ikinatuwa iyon ni Gng. Dulce

Leave a Reply