Reaksiyon Kay Bocobo

May komentaryo ngayon sa kanyang website ang kilalang columnist na si Dean Jeorge Bocobo tungkol kay Pangalawang Pangulong Guingona. Isinulat niya ang tungkol sa pagiging bisita ni Guingona sa isang political talk show kagabi sa gitna ng kontrobersiyang Jose Pidal. Sabi niya:

I thought it was somewhat OMINOUS that the Vice President has made two major appearances on television these past few days.

Ipinadala ko kay Bocobo ang sumusunod na reaksyon:

Sa kabilang banda, maigi na rin pong maaga pa ay makita na ng mga mamamayan ang kahandaan ng pangalawang pangulo na gampanan ang tungkuling inaatang sa kanya ng Saligang Batas kung sakaling ang kasalukuyang kontrobersiya ay humantong sa isa na namang People Power–na sa takbo ng mga pangyayari ay hindi nalalayo.

Na si Guingona, ika ninyo, ay dumidistansiya na sa administrasyon, ay pagpapakita ng kanyang pagkakaiba kay Gloria Macapagal-Arroyo. Bilang pangalawang pangulo ni Joseph Estrada, si Macapagal-Arroyo ay bumitaw lamang sa gabinete ni Estrada noong abot-tanaw na ang wakas ng rehimeng nakabaon sa katiwalian. Sa kabilang banda, si Guingona–na bago ang People Power 2 ay senador pa lamang at matatandaang pinakaunang mambabatas na nagtawag ng pagbibitiw ni Estrada–ay umalis na sa gabinete ni Macapagal-Arroyo noong isang taon pa dahil sa di niya pagsang-ayon sa mga patakarang panlabas ng pangulo na kilalang tagapagsalita ni US President George Bush sa Asya.

Tama po kayo. Mahigpit na tinutulan ni Pangalawang Pangulong Guingona ang mga patakaran ni Macapagal-Arroyo sa mga usapin kaugnay ng US, Iraq, digmaan, at terorismo.

Sa pakikipag-ugnayan sa US, samantalang ang pangulo ay tila alilang tango lamang nang tango, ang ninanais ni Guingona ay pantay na pagkakaibigan ng dalawang malayang bansa: “Manuel L. Quezon, our vibrant President of the past, once said, ‘I bow to no man because I am free, but I bow to God because I am a Man!’ In the same vein, I say we are partners. We are friends. But we are not vassals,” wika niya sa isang talumpati sa US embassy noong Hulyo 4.

Sa usapin ng pananakop ng US sa Iraq, samantalang si Macapagal-Arroyo ay kumampi sa “Coalition of the Shameless” ni Bush (at nauto ng mga kasinungalingan tungkol sa hindi pa rin natatagpuan at malamang ay di na matatagpuan weapons of mass destruction), si Guingona ay pumanig sa mga mamamayan ng mundo na nagmamahal sa kapayapaan at gumagalang sa kasarinlan ng malalayang bansa.

At habang si Macapagal-Arroyo ay patuloy na nagdedeklara ng todo-todong pakikidigma sa Moro Islamic Liberation Front at nagbabansag na terorista ang New People’s Army, si Guingona ay maingat na nagpapaliwanag ng pagkakaiba ng mga rebelde (MILF at NPA) at terorista (Abu Sayyaf) at nagsusulong ng usapang pangkapayapaan.

Maidagdag kong habang ang kasalukuyang administrasyon ay lulong sa ilusyong pag-unlad na dala ng globalisasyon, si Guingona ay nananawagan ng pagpapalakas ng lokal na mga negosyo at pagtatanggol sa ating pambansang patrimonya.

Sa gitna ng lahat ng iyan, hindi ba sa halip na “ominous,” ay tila magandang senyales ang pagiging visible ngayon ng pangalawang pangulo?

0 thoughts on “Reaksiyon Kay Bocobo”

  1. May sagot ba si Bocobo?

    Eto ang gusto ko sa site mo e. At least nalalaman ko ang mga samot-samot na opinyon ng mga tao, hindi lang mga tsismis, hindi lang mga kontrobersya. At least sa kababasa ko dito at sa site ni Martino, pag may nagtatanong saken kung kumusta sa Pinas, mas marami akong makukuwento bukod sa ‘okay lang.’

    Salamat Ederic.

  2. sabi nga nung isang napanood ko kagabi sa tv (i forgot the old man’s name na magpa-file ng impeachment complaint laban kay ‘tsinelas’, walang probisyon sa saligang batas na nagbabawal na pagpalit ng rehimen kahit na palapit na ang eleksyon. may urgency nang magpalit ng bihis ang gobyerno. at ang pagluluklok kay guingona ang sagot dito.

  3. salamat sa inyong mga komento, Jet, mart, at Apol. Narito ang sagot ni Dean Jorge Bocobo, nai ipino-post ko sa kanyang pahintulot:

    Ederic, Salamat sa sinulat mong ito hinggil kay Tito Guingona. Hindi nga lang kasi ako nagpapasok ng mga napakaraming mahusay na kasulatan sa wikang Pilipino sapagkat marami din akong mambabasang hindi bihasa sa ating salita.

    Hinggil sa mga sinabi mo rito, nagkakaiba ang ating kuro kuro sa tungkol sa Iraq, kahit na iginagalang ko ang kurokuro mo. Ngunit, matindi kong binatikos ang paninindigan ni Guingona diyan, sapagkat gawa-gawa lang ng opposition sa Amerika at Britanya ang pagdiin sa wmd issue–parang iyon lang dahilang ibinagsak si Saddam. Ang pinakamapanganib na wmd sa Iraq ay hindi pa nga nahuhuli, si Saddam Hussein mismo. Sinuportahan ko ang America sa digmaang iyan upang ibagsak ang BIG BROWN BROTHER ni Ferdinand Marcos, ang pasistang diktador na si Saddam Hussein, na pumatay ng pinakamaraming Muslim at Arabo mula pa ng panahon ng mga Crusada ng mga Europeo laban sa mga ito. Lubos ang patunay dito. Walang kuwentang tao iyon–hayop na walang kaluluwa o awa o pagkatao. Ang mundo ay bumuting nabagsak na siya. Malapit na siyang mahuli, sana buhay, nang ganoon ay ang mga Iraqi mismo ang pumarusa sa kanya para sa karumaldumal na mga krimeng ginawa niya, sa mga taong pinatay at pinreso niya, sa 300,000 Marsh Arabs na pinatay niya at kinemiko pa ang iba. Higit siyang hayop na minumukhang anghel si Marcos.

    Ngayon, bakit ko pinasukan ang paksang ito? Sapagkat, hindi mo ibinanggit sa sulat mo ang pinakaimportanteng sinabi ni VP::::::”I want to tell the everyone, I am not a leftist, I am not a communist. My record speaks for itself, I am a nationalist. The Communists were not at Edsa I. They were only there at Edsa II.”

    Bakit kaya niya sinabi ito na wala namang tinatanong si Pia? SINO ang gusto niyang makarinig nito? Ang mga Amerikano! Gusto niyang malaman nila ito. Mukhang hindi na siya sisipot sa mga demonstrasyon ng mga kaliwa.

    Mabuhay ka!

    Dean Jorge Bocobo
    http://deanjorgebocobo.blogspot.com/

    Nasa ibaba naman ang sagot ko:

    Maraming salamat din po sa panahong iniukol ninyo sa pagsagot ng aking sulat. Ako naman ay mas sanay sa ating wika kaya ito ginagamit ko sa Internet. Karamihan naman sa cyberfriends ko na nagbabasa ng aking blog ay nakakaunawa ng Tagalog at Filipino.

    Tuwirang magkasalungat nga ang ating saloobin sa usapin ng giyera sa Iraq. Gaya ninyo, iginagalang ko rin ang inyong opinyon sa isaping iyan.

    Sa isyu naman ng pagtanggi ni Guingona na isa siyang komunista: sa aking palagay, sinabi niya iyan upang linawin ang matagal nang pagtawag sa kanya ng ganito. Maaalalang maging si Jose Pidal, este, si Mike Arroyo pala, ay tinawag siyang komunista noong nakaraang taon. Marami pa rin kasi tayong mga kababayan na nadadala sa red scare, at iniuumpok ang mga makabayan sa mga makakaliwa.

    Ayaw kong tawaran ang pagiging consistent ng pangalawang pangulo, kaya naman naniniwala akong patuloy pa ring siyang makikita sa pagkilos ng Kaliwa sa mga usaping pinagkakasunduan nila, gaya ng pagsusulong sa makabayang ekonomiya at pagtatanggol sa pambansang soberanya.

    Salamat po ulit at padayon sa inyong pagbabahagi ng impormasyon at komentaryo sa ating mga kababayang netizens.

    Ederic Eder

    P.S. Maaari ko bang i-post sa Ederic.com ang inyong sagot sa aking reaksiyon?

Leave a Reply