Panalo na naman si Pacman

Kanina, habang nakikinig sa radyo — wala kaming pay-per-view at di ako makagamit ng Internet — ng coverage ng laban ni Manny Pacquiao, naalala ko ang namayapa kong lolo na si Tatay Andoy. Nakakaaliw siya kapag nanonood ng boksing noong bata pa ako. Medyo maingay siya, at napapasuntok pa sa hangin. Kanina, para siguro akong si Tatay Andoy.

Paano ba namang di ka mapapahiyaw sa pakikinig — hindi pa yan panonood, ha — kung sa unang round pa lang ay dalawang beses bang natumba ang kalaban? At sa ikalawang round pa lang, na-knock out na agad ni Manny Pacquiao si Ricky Hatton.

Panalo na naman si Pacman. Napasama pa nga siya sa Trends o popular keywords ng Twitter kanina. Pati mga artista sa Hollywood, namangha. Nasa mapa na naman tayo. Dininig ng langit ang mga dasal ni Aling Dionesia. Masaya na naman ang bayan ng Pambansang Kamao. Congrats, Manny; congrats, Pinas!

4 Replies to “Panalo na naman si Pacman”

  1. Dito sa bandang amin, pinoy holiday ang araw ng laban ni Pacman. Kanya-kanyang host ng party sa mga bahay na nag bayad ng Pay per View. Ako naman nag absent pa sa trabaho para lamang sa okasyon na to. Uy grabe, ang galing galing ni Pacman. Pati mga Jamaican na kilala ko nung nalaman na isang Briton ang kalaban ng Pinoy sabi nila kampi sila sa atin. Mapa-babae o lalaki naging interesado sa boxing. Yung asawa ko naman nagkatay pa ng kambing, ginawang piyesta dito sa Toronto. Yung kasamahan kong pinay na nakatira sa apartment, nag host ng Pacman party ayun nasumbong sa Superintendent ng mga kapitbahay sa sobrang hiyawan ng mga Pinoy nung bumagsak si Hitman kuno. Masaya dito pag laban ni Pacquiao.

Leave a Reply