Pagdiriwang at Kabalintunaan

Dalawampung taon na ang nakalilipas, nagkaisang-diwa ang sambayanang Pilipino sa pagbawi sa kalayaang inagaw ng isang diktador. Naganap ang EDSA People Power Revolution–ang handog ng Pilipino sa mundo–na nabalita at ginaya sa buong daigdig.

Kanina, ipinahinto ng maykapangyarihan ang lahat ng pag-alaala sa yugtong iyon ng ating kasaysayan. Ngunit bago iyon, ibinaba ang isang kautusang naglalagay sa panganib sa kalayaang binawi ng Pilipino sa EDSA noong Pebrero 1986.

Nagising tayo sa balitang napigilan ng pamunuan ng sandatahang lakas ang tangkang pagpapahayag ng ilang pinuno at kasapi ng tanggulang pambansa ng kanilang pagbawi ng suporta sa pamahalaang Macapagal-Arroyo.

Ngunit sa kabila ng tagumpay na ito ng pamahalaan, biglang isinailalim ni Arroyo ang buong bansa sa state of emergency o kalagayan ng pambansang kagipitan. Kahit na sinabi niyang ang ang sitwasyon ay ‘under control’, ang umano’y sabwatan daw ng mga rebeldeng sundalo at mga rebeldeng komunista ay naglalagay sa bansa sa ‘malinaw at kasalukuyang panganib sa bansa at sa taong bayan.’

Kung nade-dejavu kayo, ito’y dahil ang dahilang iyan din ang isa sa mga ginamit ng diktador na si Ferdinand Marcos nang ibaba niya ang Batas Militar noong Setyembre 1972.

Samantala, ipinahayag naman ng punong alalay ni Arroyo, ang dating aktibistang si Mike Defensor, ang pagbabawal sa lahat ng rally–kahit na ‘yaong isasagawa upang ipagdiwang ang anibersaryo ng People Power.

Ngunit ang mga mamamayang dalawang beses nang nagwagi sa EDSA People Power–noong 1986, at muli, noong 2001–ay hindi papayag na hindi ipagdiwang ang mga tagumpay na ito. Kasabay ng pag-alaala sa EDSA, muli rin nilang iginiit ang panawagang bumaba na sa puwesto si Arroyo, na kilala rin bilang pekeng pangulo.

Mas lalo namang bumangis ang pulisya dahil sa ibinabang kautusan ng kanilang kumander. Ang mga mamamayang mapayapang nagpoprotesta ay binuwag, at ang iba’y ikinulong, na para bang wala nang bisa ang karapatan sa malayang pamamahayag at pagpapahayag na nakasaad sa Saligang Batas.

Sa araw na ito, ang pagdiriwang ay naging kabalintunaan. Sa araw na ito, itinapon ni Gng. Arroyo ang natitirang pamana ng isang pinakamaningning na bahagi ng ating kasaysayan sa nakalipas na dalawampung taon.

0 thoughts on “Pagdiriwang at Kabalintunaan”

  1. dati palng aktibista si mike defensor, akala ko gustong mag-artista e syadong nagpapakyut, sya lang ata naiwan na katabi ni gloria sa mga spice boys, me naamoy ako lol! Martial law na nga …… ang proklamasyon ni gloria e nagtatago lang sa pamagat na STATE OF NATIONAL EMERGENCY, lantaran na ang warrantless arrest, nag raid na ng dyaryong lantarang tumutuligsa sa kanya, balita ko inaresto na rin daw si Crispin Beltran at Satur Ocampo. marami na namang magiging aktibista at to the extreme, daming mamumundok, lalong matatakot si GLORIA nyan.Lagot!pag MARTIAL LAW na nga lalo lang di mapapalayas ang bansot sa malakanyang uhmmnn mga 20 years siguro lol! bute na lang la akong pinas :)(joke joke joke!)saya saya! madadagdagan ang kasalanan sa bayan ni GMA, human rights violator!

  2. kahapon laging nasa news ang Pilipinas dito sa primetime news. Pati sa free dailies din, sinasabi na parang nangyari yung kay Marcos dati. Pati ang mga Caucasians at iba pang lahi, nagtatanong. Kaya ako naman, sinasabi ko ang kakahiyang nangyayari sa Pilipinas.

    Nakakaiyak.

Leave a Reply