Maligayang Pasko!

regalo Maligayang Pasko po! Wala akong ibang regalo sa mga naligaw sa pahinang ito ngayong Pasko kundi ang maikling update na ito.

Kumusta ang Kapaskuhan n’yo? Ikukuwento ko ang bisperas ng Pasko ko upang sa mga susunod na taon ay mas maalala ko ito.

Nagyaya ang team ko sa GMA News na mag-lunch kanina. Sa Nomnomnom sila pumunta at sumunod lang ako. Nakakatawa lang kasi nakalipat na pala ang restaurant na iyon pero sa lumang lokasyon nila ako pumunta. Nakahabol din ako at pagkatapos ng late lunch at kwentuhan ay bumalik na kami sa opisina sakay ng bagong kotse ng isa sa mga kasamahan namin.

Opo, may pasok po kami kahit holiday. Alam n’yo namang ganyan sa larangan ng pagbabalita. Pagsapit ng gabi, sa pagtatapos ng State of the Nation with Jessica Soho, nakisali ako sa mga kumakaway para makita sa telebisyon. Tradisyon na ito na tuwing Pasko at Bagong Taon: Ang mga grupo ng mga nasa likod ng kamera ay nabibigyan ng ilang segundong airtime para kumaway sa TV.

Pagkatapos ng trabaho, umuwi na kami ni M para mag-Noche Buena. Bukod sa pagkaing galing sa pamilya’t mga kaibigan, may hamon din kami. Galing ito sa staff ng “Ang Pinaka.” Habang tumutugtog ang mga awiting pamasko — at dinig din ang malakas na pagkakaraoke ng mga kapitbahay–pinagsaluhan namin ang aming Noche Buena.

Maya-maya pa’y sunod-sunod na ang pagdating mga mga mensahe ng pagbati ng Maligayang Pasko sa pamamagitan ng text at social media. Tumawag na rin kami sa aming pamilya para bumati sa kanila.

Tatapusin ko na muna ang entry na ito para makasagot sa mga pumapasok pang greetings. Merry Christmas ulit, at salamat sa pagdaan!

Leave a Reply