Iskuwater: I-Witness ni Sandra Aguinaldo

Press release ng I-Witness para sa pagtatanghal sa Lunes, Nobyembre 14, 2005

Magulo, masikip, maingay… sadlak sa hirap. Ito raw ang buhay iskwater. Isang kahig, isang tuka. Pero sinong mag-aakalang sa gitna ng tinaguriang mundo ng mahihirap, meron din palang nakatagong yaman?

Yan ang madidiskubre ni Sandra Aguinaldo ngayong Lunes sa I-Witness. Nagbabago na nga raw ang ihip ng hangin para sa mga taong inaakala nating mahirap pa sa daga. May mga nakatira ngayon sa squatter’s area na nakahiga na sa pera!

Si Max Gayula, halos dalawang dekada nang nakatira sa squatter’s compound ng NIA road sa Quezon City. Sa unang kita, aakalain mong walang sinabi, pero aminado siyang yumaman siya sa iskwater.

Bukod sa negosyong water refilling station, pag-aari ni Max ang isang starex van, limang taxi, mga lote sa probinsya at isang condo unit sa Makati! Pero sa kabila ng dami ng ari-arian, hinding hindi niya raw iiwan ang kanyang bahay sa NIA, kahit pa ang lupang kinatitirikan nito, pag-aari ng gobyerno!

Isa lang si Mang Max sa mga illegal na residente ng NIA road na natupok ng apoy sa naganap na malaking sunog dalawang linggo lang ang nakalilipas.

Pero matapos lang ang halos dalawang linggo… animo’y walang trahedyang naganap sa NIA Road. Simbilis ng kabute na muling nagsulputan ang mga bahay… at ang buhay ng mga nakatira doon, balik sa nakagawian.

Pero hindi lahat, nakakaya ang hirap. Makikilala ni Sandra ang pamilya ni Rolly, isang pedicab driver na nasunugan. Matapos ang sunog, nakatira na lang sa kalye ang kanyang asawa at isang taong gulang na anak, ang tanging proteksyon sa ulan, trapal at plastik. Sa tindi ng hirap na dinanas, nagdesisyon ang pamilya na muling bumalik sa probinsya at tuluyan ng iwan ang buhay iskwater.

Samahan si Sandra Aguinaldo kilalanin ang dalawang mukha ng ‘Iskwater’ sa I-Witness ngayong Lunes, pagkatapos ng Saksi sa GMA-7.

0 thoughts on “Iskuwater: I-Witness ni Sandra Aguinaldo”

  1. i really love watching television documentaries like your program. it is indeed an eye opener to me and it increases social awaweness to all. But I hope that ur program will be scheduled to an earlier timeslot.
    Congrats and more power!

  2. hi, miss sandra, kababayan mo ako, sister ko si manuel jugo, ka-schoolmate mo. proud na proud ako sa yo, nakikita lang kasi kita dati pag tumatao sa botica, farmacia magdalena, ang natatandaan ko naghihikab ka pa non,hahaha, bata ka pa, classmate ko si arlene villaluz, pinsan mo yata sya. itatanong ko lang kung mauulit pa ang coverage nyo sa uae. gusto ko kasi sanang mapanood muli yung mga kababayan natin na nagtagumpay at nakahanap ng magandang trabaho doon, pati na rin ang mga kaawa-awa nating kababayan sa kish island, na halos nawawalan na ng pag-asa sa sobrang kahirapan na dinaranas nila don. marami kasing kwento ang mga kapatid ko pati na rin ang nanay ko nung nag-exit sila don, sana pag ukulan sila ng pansin ng gobyerno natin sa pamamagitan ng mga documentries nyo. si manuel nga pala ay maganda na rin ang naging position sa company na pinapasukan nya, sa commercial bank of dubai, officer na sya sa credit and risk department, pati na rin ang kapatid namin na si rolando na nagtatrabaho as designer sa isang company doon.

    maraming salamat sa pagbasa mo sa sulat ko, more power and God bless.

Leave a Reply