Inosente

“Unlike the real suicide bombers in, say, Israel, his body parts are accounted for, and his face is still recognizable. It has the look of innocence, as if Montasser Sudang didn’t know the end was near.”

–“An innocent man,” Philippine Daily Inquirer editorial

Noong una, natatawa pa ako sa balitang ang militar ay may inilabas na bio-data ng napatay na suspek sa pambobomba sa Davao International Airport. Kasi naman, yung bio-data na nabanggit ay pinalalabas ng militar na apllication or information sheet ni Montasser sa Moro Islamic Liberation Front (MILF). Pero, hello?! Di ba napakakakaiba na ang isang rebolusyunaryong grupo tulad ng MILF ay magpa-file ng biodata ng mga miyembro nito na parang ito’y isang student org sa unibersidad?

Ang mas nakakatawa pa riyan, sa nasabing data sheet–na umano’y nakuha ng militar pagkatapos ng isang sagupaan tatlong taon na ang nakalilipas–ay kakaiba ang baybay ng pangalan ni Montasser–ang nakalagay ay Muntaser, Sudang–at may comma pa sa pagitan ng first at last name. Bulok din ang form, sapagkat ang ibang fields ay may typo errors pa. Walang lagda si Montasser, at wala ring nakalagda sa field na “Certified true and correct by:” sa ibaba ng kanyang datos.

So, alam mo yun, nakakatawa talaga kung gaano kadesperado ang militar para idiin at iugnay sa MILF yung pobreng patay na biktima ng pambobomba. Parang pang-“Onli in da Pilipins” talaga.

Pero hindi na ako natawa nang marinig ko ang balitang ang ama ni Montasser at ang kanyang tiyo ay dinakip at ikinulong na rin. Lalo pa nang mabalitaan kong kapapanganak lang kanyang 15 taong gulang na asawa.

Ayon sa mga kaibigan at kamag-anak ni Montasser na nakapanayam ng Inquirer, excited ang lalaki sapagkat unang beses niyang makakarating sa Lungsod ng Davao para sunduin ang kanyang pinsan. Sumitar pa siya ng jeep at nagsama ng 29 na kamag-anak, kabilang ang ilang bata.

Maging ang meyor ng Hilagang Cotabato, ang bayan ni Montasser, ay nagsabing kaya niyang patunayan sa pamamagitan ng mga tunay at legal na dokumento, na ang biktima–o suspek ng militar–ay isang simple at mapayapang mamamayan.

Ngunit sa kanyang kamatayan, si Montasser Sudang, 23, ay ayaw bigyan ng mapayapang paghimlay ng mga maykapangyarihan.

0 thoughts on “Inosente

  1. i agree. ang bulok-bulok ng criminal investigation system ng bansa natin. you should read decisions of the supreme court on criminal cases at matatawa ka sa mga bases ng police/military in arresting people and filing criminal complaints against them.

    and shet, me death penalty pa tayo. ang lungkot.

    on the other hand, i think, the military is resorting to that coz they actually know who the real culprits are, kaya lang, and evidence na hawak nila ay inadmissible because of the bill of rights protection, or siguro, uncorroborated, gumagawa-gawa na lang sila ng evidence na hindi covered ng bill of rights protection (assuming na gumawa nga sila).

    haaay…lintek na mga terorista ‘yan, ba’t ang linis nilang magtrabaho?

  2. Ikinakatwiran lang nila ‘yang pagkakaroon ng Bill of Rights na ‘yan para ma-justify ang pagpapataw ng mga authoritarian measure. Hari-harian kasi uli sila, parang noong martial law, kapag nagkaroon uli ng systematic authoritarian rule.

    E nahuli nga nila si Khadaffi Janjalani noong panahon ni Ramos sa kalagitnaan ng pagkakaroon ng Bill of Rights (na bagama’t bihirang sundin ay nagagamit pa rin naman ng mga biktima ng human rights violation)–ngayon pa nila di mahuhuli ang mas maliliit na isda?

    Para ring y’ong Abu Sayyaf. Nang ipag-utos ni GMA na sagipin si Jeffrey Schilling, halos maubos sila. Ano’t biglang hindi na nila mahuli ngayon, at natakasan pa ang kanilang military cordon? Halatang tama ang sinasabi sa kanta nina Jess Santiago at Gary Granada: “Pa’no mahuhuli/Kung ang hinuhuli/At ang nanghuhuli/Pala’y magkakampi”. Katulad ng sinabi ni Conrad de Quiros sa isa niyang kolum, natutunan kasi ng mga opisyal ng militar ang sining ng pakikipagsabwatan sa mga bandido.

    Kaya ako natuto nang huwag magpapaniwala sa sinasabi ng militar, e. Itinuturo ng karanasan na ang pagpapalagay ng kawalang-kasalanan (presumption of innocence), mula sa punto de bista ng mga sumusubaybay sa balita, ay di dapat na sumakop sa militar.

  3. Sa isang nasubaybayan kong palitan ng e-mail, lumalabas na itong mga tumutugis diumano sa MILF ay sila pang may pakana ng bombahan sa Mindanao. Ganito rin ang sinasabi sa bagong kolum ni Teddy Casiño.

    Tila sila mismo ang nagsasagawa nito–at pagkatapos ay inidiriin ang MILF kung kanino sila may pakikipagkasunduang pagtitigil-putukan–upang pangatwiranan ang kanilang paghimod sa butas ng puwit ni GI Joe.

Leave a Reply

Your email address will not be published. Required fields are marked *