Captain Barbell

Sa maniwala kayo’t sa hindi, ngayong taon ko lamang napanood ang mga pelikulang Superman. Nakakaaliw nga dahil para akong si Migmig, na tuwang-tuwa sa Superman. Bagamat dati’y napapanood ko sa TV ang “Louis and Clark”, etong Superman I to IV ay ngayon ko lang na-enjoy. (Ikukuwento ko sa ibang panahon ang tungkol sa pagka-Superman fan ko.) Noong lumalaki kasi ako sa probinsya, hindi uso sa akin ang mga dayuhang palabas. Lumaki akong sina Darna at Captain Barbell, Zarbot, Bioman at Shaider ang mga superhero sa komiks at telebisyon.

Naalala ko pa nang napanood ko ang Captain Barbell noong 1980s. Ito yung si Edu Manzano ang Captain Barbell, si Herbert Bautista ang Teng-teng, at si Sharon Cuneta ang Darna. Sa isang classroom ito ipinalabas sa high school na kalauna’y magiging paaralan ko rin. Noon kasi’y may mga nagpapalabas ng mga sine sa barangay namin. May dala silang malaking projection screen, at may kadobol ang bawat palabas. Doon ko rin napanood ang pelikula ni Sharon na Kailan Sasabihing Mahal Kita, na halaw rin sa komiks, at ang Halimaw sa Banga.

Mabalik tayo sa Captain Barbell, tuwang-tuwa ako sa pelikulang iyon. Napanaginipan ko pa nga na inilipad daw ako nina Captain Barbell at Darna. Anuman ang sabihin ng iba sa special effects ng may pagka-comedy na pelikulang iyon, kung magkakaroon ako ng DVD nito ay ikatutuwa ko pa rin.

Noong 2003 naman, di ko rin pinalagpas ang Captain Barbell na pinagbidahan nina Bong Revilla, Ogie Alcasid, at Regine Velasquez.

Kahit tila nagamit sa kampanya ni Bong Revilla sa pagka-senador ang pelikula, at kahit hindi kamangha-mangha ang teknikal na aspekto ng pelikula, nagustuhan ko ito dahil “malinaw nitong naipahatid sa audience�sa kaso ng Captain Barbell, ay mga bata�ang mga pagpapahalaga (values) na salat na salat at hindi na makikita sa marami sa mga pelikula ngayon… Ilang ulit na ipinakita ni Enteng na ginampanan ni Ogie Alcasid ang kahalagahan ng pagmamahal sa pamilya, ng pagiging masipag, masikap at matipid, at lalung-lalo na, ang kababaan ng loob. Ang totoo niyan, kaya siya ang napiling pagkalooban ng kapangyarihan na maging Captain Barbell (Bong Revilla), ay dahil sa busilak niyang kalooban.”

(Sa blog na Psychicpants, may mas malawak at maalam na paliwanag kung paanong naipakita at nagamit sa Captain Barbell ang mga dalumat ng loob at labas sa Sikolohiyang Pilipino. Dito rin naihambing ang kuwento ni Captain Barbell sa alamat ni Bernardo Carpio, na iniuugnay naman ng ilang makabayan kay Supremong Andres Bonifacio. Magsusulat din ako hinggil dito sa susunod.)

At ngayon nga, matapos ang muling paglipad ni Darna, ang partner niyang si Captain Barbell naman ang ngayo’y nagbabalik. Mapapanood na rin natin sa telebisyon si Captain Barbell sa GMA-7, ang ating Kapuso Network. Gagampanan ni Richard Gutierrez, na lalong nakilala sa Mulawin at Sugo, ang papel ni Teng at ni Captain Barbell. Gaya ng pagpapalabas sa Darna, may basbas din ni Mars Ravelo ang pagsasatelebisyon ng isa pang likha ng dakilang nobelista sa komiks.

Sa pananaliksik ko sa Internet, nakita kong unang lumabas si Captain Barbell sa Pinoy Komiks noong Hulyo 18, 1963. Mula pa rin sa International Superheroes website, narito ang iba pang impormasyon tungkol kay Captain Barbell.

Sa mga unang patalastas ng bagong Captain Barbell ay may nakita akong pagkakahawig–o panggagaya?– sa Superman, lalo na ‘yung batang nagbubuhat ng kotse. Medyo kakaiba rin ang pagiging galing ni Captain Barbell sa kinabukasan. Mala-Kal el ng Superman na naglakbay mula sa isang mundong mas sulong sa teknolohiya. Pati ang kasuotan niya ay gawa naman daw ng lumikha ng custome nina Batman at Robin. Di ko alam kung bakit kailangang pagsuotin ng imported na damit ang isang Pilipinong superhero–parang ito ang pagsasalita ni Darna ng English sa bagong komiks. Masyado ring tisoy si Richard, pero sabagay kahit si Edu naman ay ganoon din. Medyo co�ita yung leading lady niya–pero sabagay, marami nagkalat naman talaga ang mga ganoong kabataan sa panahong ito.

Kaya sa kabila ng mga ito, hinihikayat ko pa rin kayong panoorin ang Captain Barbell, dahil maaaring mali ang mga unang impresyon gaya ng sa kaso ng Encantadia (na sa una akala nati’y kopya lang ng Lord of the Rings pero sa katagala’y naging isang magaling na telenobela). Gusto ko rin ang theme song, “Nandito lang Ako,” ng Shamrock. Puwede rin tayong aktibong makilahok sa talakayan tungkol kay Captain Barbell sa iGMA.tv forum.

0 thoughts on “Captain Barbell

  1. ang galing ng costume, may mga muscle na rin. hehehe. at parang eto lang yung alam kong captain barbell na iisa lang yung aktor para kay enteng at captain barbell

  2. Myla: Superman addict talaga yung si Migmig. Mana sa akin, hehe. Kaya siguro adik sa Superman.

    Lordan: Mas maganda nga lang sana kung di masyadong nanggagaya, hehe.

  3. masyado magastos ung costume mas maganda siguro kung pinoy na lang ang gumawa para naman native na pinoy si captain barbell.

  4. nakakalungkot lang na hindi napreserve ‘yung original idea sa katauhan ni captain barbell – bakit biglang naging spaceship or some kind of meteor na bumagsak sa isang bayan at sakay nito ang batang si teng – hola! sounds like smallville. kaya dapat ang title niya ay “CAPTAIN BARVILLE.”

    grabe naman, nakakainsulto, parang masyadong na-underestimate ang audience, akala ba nila hindi nakakapanood ng smallville ang mga manonood. or baka inisip nila, hindi alam ng audience bracket tuning into gma7 on that time slot ang smallville. or dahil nag-hit ang smallville, inisip nila baka kapag nanggaya ng concept, maghit din sila.

    well, what can we say? nagtamad-tamaran na naman ang production staff behind captain barbell.

    ngayon ko lang din narealize hindi pala talaga taga-sariling bayan ang tagapagligtas – sila pala ay dayuhan – worse – alien pa pala. tingnan mo si darna galing palang planetang marte – at si captain barbell, galing sa planeta ng mga robot na ewan.

    sabagay, hindi naman talagang maaring magkaroon ng superpowers kung isa kang hamak na tao – unless, may posisyon ka tulad ni gloria na dinadaan sa kanyang super powers para pagtakpan ang naghihingalong istruktura ng edukasyon – literal na istruktura ito.

    kaya kayang iligtas ni captain barbell si fe hidalgo?

  5. Sana malaman ito ng Warner Brothers sa panggagaya ng Captain Barbell TV series sa Smallville! Insulto ito sa kulturang Pilipino! Hindi bobo ang mga manonood!

  6. Itong storyline ni Captain Barbell sa Kapuso Network e parang tira-tirang pagkain na pinaghalo-halo masabi lang na may kwento. Ang kinalabasan tuloy e kaning-baboy na walang kwenta.

Leave a Reply

Your email address will not be published. Required fields are marked *