Buhay at Bukid

“Pls support & pray 4 our farmers who will hold a peaceful march today to ask GMA 4 land & social justice.” Ganyan ang text message na natanggap ko kahapon mula kay Tonyo, kaibigan at kasamahan ko sa TXTPower at Bloggers’ Kapihan.

Ika-21 anibersaryo ng Mendiola Massacre kahapon, at nagtipun-tipon sa Chino Roces Bridge (dating Mendiola) ang mga magsasaka mula sa Timog Katagalugan upang igiit ang kanilang panawagan para sa tunay na repormang agraryo.

Sa Mendiola Massacre, 13 magsasaka ang namatay matapos pagbabarilin ng mga sundalo habang nagpoprotesta sila noong Enero 22, 1987–wala pang isang taon matapos maluklok sa Malacanang si Pangulong Cory Aquino dahil sa Edsa People Power Revolution.

Sa awa ng Diyos at sa pagsusumikap kapwa ng mga magsasakang nag-rally at ng pamahalaan, naging mapayapa ang rally kahapon. Sana lang, may kahinatnatnan rin ang mga hinihiling nila.

***
 Noong nasa kolehiyo pa ako, lagi naming pinapatugtog sa bahay yung tape ko ng Buklod. Paborito ng mga batang anak ng landlord namin yung “Buhay at Bukid”. Sumasayaw-sayaw pa kami habang pinapatugtog at sinasabayan ito:

Ang “Buhay at Bukid” ay naglalarawan ng buhay ng mga kababayan nating magsasaka tulad ng mga taga-Sumilao at mga taga-Timog Katagalugang pumunta sa Mendiola kahapon. Isinasatitik din nito ang kanilang mga adhikain at pangarap, na sinasang-ayunan at hinihiling din natin para sa kanila.

Narito ang lyrics ng “Buhay at Bukid” ng Buklod mula sa isang fansite para kay Noel Cabangon:

BUHAY AT BUKID

Ang buhay niya ay bukid
Kaulayaw bawat saglit
Munti niyang pangarap
Dito na nailibing.

Kailan pa ba makikita ang lupang minana
Ay maaari na ring tawaging kanya
Bawat butil na pinagyaman
Ay pait ng kawalan

Sa gitna ng kahirapan
May uring nakinabang.
Kailan pa ba makikita ang lupang minana
Ay maaari na ring tawaging kanya?

Lalaya rin ang lupa’t mga magsasaka
Tutulungan sila ng mga manggagawa
Babawiin ang lupang ninakaw ng iilan
At ang bunga ng lupa’y bayan na ang aani.

Lalaya rin…
Lalala, lalalala, lala, lala
Lalala, lalalala, lala, lalala
Lalala, lalalala, lala, lala
Lala, lala, lala

3 thoughts on “Buhay at Bukid”

  1. Nung una kong napanood yung footages nung Mendiola Massacre, talagang napaluha ako. The people just wanted genuine agrarian reform even until now, pero their pleas still fall on deaf ears.

    Isa sa mga paborito kong kanta ng Buklod ang Buhay at Bukid. 🙂

  2. Naunahan mo ako sa paggamit ng kantang ito upang suportahan ang mga magbubukid na naglakad papuntang Mendiola.

    Nakakalungkot, dahil hanggang ngayon mula sa araw na naganap ang Mendiola Massacre, ay walang pinagbago ang kalagayan ng mga magbubukid. Pero, tuloy pa rin ang pakikibaka.

  3. Talagang dapat tuloy ang pakikibaka hangga’t hindi nagkakaroon ng tunay na repormang agraryo. Wala pa ‘kong naririnig na bansa na tumikim ng pag-unlad nang hindi pinatutupad ang tunay na repormang agraryo.

    Sana bitawan na ng mga haciendero ang lupaing kanilang inangkin at ipamahagi na nila ito sa mga matagal nang naghihirap at nagsasaka sa lupain. Panahon na para gampanan ng pamahalaan ang kanilang tungkulin sa taong-bayan lalung-lalo na sa mga magsasaka.

Leave a Reply