Ako Mismo

Ako Mismo

Agad akong nag-sign up nang makita ko ang AkoMismo.org — hindi lang dahil Ely Buendia fan ako, kundi dahil nagustuhan ko ang kampanya.

Hinihiling ng Ako Mismo sa mga Pinoy netizens na isulat ang kanilang pangakong gagawin — maliit man o malaki — “tungo sa muling pagbangon ng Pilipinas.”

Sabi nga nila, ang pagbabago’y mag-uugat sa ating sarili. Upang maisulong ang isang rebolusyon, dapat ay magkaroon muna ng pagbabago sa atin mismong pagkatao.

Sa pagpo-post ng ating mumunting pangako para nating isinisigaw sa buong mundo ang ating nais iambag. Idagdag pa ang pagkakaroon ng bagay na magpapaalaala sa atin sa pangakong binitawan — ito yung sikat na sikat na dog tag. Mahihiya naman siguro tayo sa ating sarili na hindi ito tuparin. Konsensya na natin yun, kumbaga.

Pagkatapos ng People Power 2, marami na tayong mga nakitang kampanya para sa mabuting pamamahala. Sadya nga lang yatang immuned na ang kasalukuyang administrasyon, pero may mga personalidad at grupo pa rin namang patuloy na nagsusulong nito.

Sa tingin ko, ang good governance initiatives ay dapat ding sabayan ng kampanya para naman maging mabuting mamamayan. Dito makakatulong ang Ako Mismo. Pinupukaw nito ang mga kabataan upang makisangkot at kumilos.

Mahusay ang paraang ginamit ng Ako Mismo. Ginawa nilang mga mukha ng kampanya ang mga kilalang idolo ng mga kabataan at ilang kababayang nagbigay ng karangalan sa bansa. Dahil dito, nakuha nila ang pansin ng ibang kabataang kadalasa’y apathetic sa mga usaping pambayan.

Puwedeng sabihing ang target ng kampanya ay ang mga elite at middle class na may Internet access. Pero di ba’t nakakatuwang kahit sa ganitong paraan ay makisangkot ang mga sosyal at pasosyal nating kababayan? Kesa naman puro Embassy o Bora ang pinagkakaabalahan nila, di ba?

Dahil walang partikular na isyung dinadala ang Ako Mismo, malaya ang mga sumasali rito na bitbitin ang advocacy na gusto nila, kahit sa pinakasimpleng bagay gaya ng tamang pagtatapon ng basura o pagboto nang tama. Pero kahit napakarami ng concerns na nais dalhin ng mga nakikiisa, may common thread sa lahat ng ito — ang pagsisikap na maging mabuting mamamayan at pagkilos tungo sa bagong Pilipinas.

Ang mabuting mamamayan, bayan muna ang iniisip at may malasakit sa kapwa Pilipino. Hindi siya mauuto ng mga trapo kaya’t malamang sa hindi ay boboto sa mabubuting kandidato, na kapag naupo’y maaasahang mamumuno nang marangal.

Nitong mga nakalipas na araw ay nakatanggap ng mga batikos at pinagdudahan ang Ako Mismo. Normal naman ang ganitong kuwestiyon sa bawat kilusan, lalo’t hindi nagpakilala ang mga nasa likod ng kampanya. Valid din ang ilang isyu na binanggit, lalo na yung tungkol sa security ng personal information. Pero nakaka-disappoint lang na karamihan sa pinakamatitindi ang batikos ay mga kabilang din sa mga grupong nagsusulong din ng pakikisangkot at pagbabago.

Naniniwala akong di naman iisa lang ang landas tungo sa pagbangon ng bansa. Bawat isa ay may pananagutan — at nakasalalay sa ating kakayanan, karanasan, at interes kung paano natin tutugunan ang pananagutang ito.

Magandang makilahok tayo sa Ako Mismo. Ngayong nalalapit na naman ang panahon ng pagpili ng ating mga pinuno, at sa gitna ng kasalukuyang malawakang pagbabandila ng nasyonalismong Pilipino, napapanahon ang kampanyang ito.

At kung di-tawag dalangin ay magkatotoo ang mga haka-hakang gagamitin lamang ang Ako Mismo ng ilang personalidad — si Manny Pangilinan man iyan ng PLDT-Smart o si Edu Manzano na kaalyado ng administrasyon — sabi nga ng isang cyberfriend ko, konsensya na nila ‘yun.

***

Eto naman ang isinulat ng ilang cyberfriends ko at iba pang bloggers tungkol sa Ako Mismo:

11 thoughts on “Ako Mismo”

  1. kuya ederic, natandaan mo ba noon nang magsagawa ng “advertisement” ang gobyerno tungkol sa “pagbabago mula sa sarili”? yung kay Mr. Shooli yata yun. hmm.. mukhang iba yata ang nababasa ko sa blog mo ngayon. naitanong ko tuloy sa isipan ko, ang isa bang adhikain ay nagiging maganda o pangit depende sa nangunguna o nagpapasimula nito? hindi ba dapat ang adhikain ay may sariling pagkakakilanlan at hindi dumedepende sa kung sino ang nagsusulong nito?

    may hidden agenda man o wala, ang adhikain ay adhikain. dapat walang nababago.

    akin lang naman. kopi roti tayo? 😉

  2. I have nothing against self-initiative. Pero sa totoo lang, we have too much of that already. Di ba ang problema nga natin ngayon ay marami sa atin ang may kanya-kanyang initiative pero walang unified action?

    Tingnan niyo na lang itong kaso ng “The Great Book Blockade of 2009”. Maraming nagreact. Maraming nagpost sa mga blog. Pero meron bang unified response?

    There is a lot of individual outrage there over the GMA administration. But what we lack is a collective outrage to impeach her.

    Sa garbage segregation, maraming nagsesegragate ng basura. Pero walang collective effort to have separate garbage collection schedules kaya yung individually segregated na basura, napagsasama sama rin.

    Naalala ko tuloy nung minsang nakikinig ako ng sermon. sinabi dun yung usual na position ng Simbahan na change must start with ourselves. Di ko miminsang nasabi na “Nagbago na po ako, I have done my part. Ano na ang susunod?”

    Paengs last blog post..Career

  3. “ako mismo” slogan okey yan, magtulungan tayo para di na muli tayo madaya sa election. Suportahan nio rin sana yung naunang slogan diyan na napanood ko sa UNTV. “Isang Araw Lang”..Maganda rin ang objective

Leave a Reply