Kabi-kabila ngayon ang mga daliring nakaturo sa Bagong Hukbong Bayan (NPA) kaugnay ng pagkakapatay sa dating rebeldeng si Romulo Kintanar. Mula sa Philippine National Police hanggang sa Palasyo, ang NPA ang sinisisi sa pamamaril kay Kintanar kahapon sa Quezon Memorial Center. Si Kintanar ay nagbalik-loob na sa pamahalaan. Tiyak na lalala pa ang ganitong pamimintang lalo na’t napabalita rin ang pagkapatay kanina sa isa pang dating lider ng NPA sa Bulacan.

Matapos ang halos maghapong pagtulog at ilang oras sa aking computer, ipinasya kong lumabas upang kumain ng gulay sa Bodhi. Naisipan ko ring muling manood ng sine. Dahil napanood ko na ang Dekada ’70 at Lord of the Rings, Mano Po ang pinanood ko. Maganda nga ang pelikula. All-star cast. Matindi ang kuwento. Gaya ng Dekada ’70, sinasalamin din nito ang lipunan. May mga mabubuting aral din itong itinuturo. Yun nga lang, nakakapanghinayang pa rin na mas maraming nanood ng Mano Po kaysa sa Dekada ’70. Ang Dekada ay kasaysayan hindi lamang ng isang sektor–ito’y pagsasalarawan ng kuwento ng isang buong bayang sinakal at minasaker ng diktador na suportado ng bansang mananakop.

Noong ika-51 kaarawan ng yumao kong ina, patungo ako ng Mediola kasama ang ilang daang libong katao upang pababain sa puwesto si Erap. Makalipas ang dalawang taon, sa mga panahong watak-watak na ulit maging ang People Power 2 forces, nagawa kong muling samahan at iulat ang mga aktibistang bumabatikos sa pagtataksil ni Gloria sa diwa ng EDSA at nagawa ko ring pakinggan at kunan ng larawan si Gloria habang muling nangangako ng mga pagbabago. Sa gitna ng lahat ng ito, kasama ko pa rin sa aking isipan at alaala ang mahal kong ina.

So, naki-cha-cha na rin si Ate Glo. Dati’y wala siyang pinapanigan, pero ngayo’y tila nakumbinsi na siya ni Speaker De Venecia, ang pangunahing may pakana ng pagsusulong ng mga pagbabago sa Saligang Batas ng Republika ng Pilipinas. Ngayon, ang pinagtatalunan na lang nila ay kung constitutional convention ba o constituent assembly ang prosesong dadaanan ng hakbangin ito. Sa gitna ng lahat ng ito, isinaalang-alang ba ang kagustuhan ng mga Pilipino?

Maiba tayo, congrats nga pala kay Jol sa kanyang bagong “pseudo-blog.”